Le comportement de Gilles Simeoni critiqué par l'opposition municipale bastiaise
(A redazzioni d'Alta Frequenza) - Ssu luni, l'uppusizioni municipali bastiaccia, cù Jean Zuccarelli pà i radicali è vicini, è Francis Riolacci pà u Partitu cumunistu, hà urganizatu una cunfarenza di stampa pà vultà annant'à i primi sittimani di a mandatura di Gilles Simeoni. I dui gruppi, chì t'ani in tuttu novi eletti, si sò difiniti com'è un'uppusizioni attenti è si sò inchietati par asempiu di veda chì i prughjetti ingaghjati da l'anzianu merri, Emile Zuccarelli, prisenti di manera discreta à mezu à a ghjenti ssu luni, ùn avanzani più. Altru rimprovaru fattu à a nova municipalità è Gilles Simeoni particularmenti, quillu annant'à i simbuli. U simbulu di a sciarpa à trè culori par asempiu, è u fattu chì u merri di Bastia ùn l'avissi micca purtata duranti i ceremonii di l'8 di maghju, hà surpresu di gattiva manera l'uppusizioni. Altru simbulu, quillu di a prisenza di u merri à a manifestazioni di u 10 di maghju, iniziata da u cullettivu "Simu di stu Paese". Pà l'uppusizioni, hè u leader naziunalistu è micca u merri di Bastia chì era in carrughju ssu ghjornu quì, una prisenza chì ùn li cunveni micca soprattuttu di pettu à i slogans è à l'incidenti accaduti à a fin di a manifestazioni.
Steti à senta à Francis Riolacci, leader di u gruppu cumunistu di u cunsighju municipali di Bastia è chì faci parti di l'uppusizioni.
