Le dossier du Puntettu au centre d'un débat houleux au conseil municipal de Bastia
(A redazzioni d'Alta Frequenza) - Ssu marcuri c'era u cunsighju municipali di a cità di Bastia, è pà tuttu u mondu, era un pezzu chì l'ambiu ùn era più statu cusì elettricu. Ci voli à dì chì u votu di u raportu di spertizia nant'à u rinnovu di u quartieru di u Puntettu hè statu à u centru di un dibattitu longu cù voci alzati è picculi infrasati aspri. Un scambiu verbali puntenti soprattuttu trà Ange Rovere, u primu aghjuntu di a cità, è Gilles Simeoni, uppostu più cà mai à u prughjettu municipali è chì hà prisintatu, cù Inseme per Bastia, un prughjettu alternativu asaminatu duranti un tempu longu ind'u raportu. Quissu quì hè statu qualificatu da Ange Rovere di micca rialistu, manchendu di ditagli tennichi è finanziari sicondu u raportu, è purtendu à a speculazioni immubiliari di pettu à u so carattaru largamenti privatu. U publicu, custituitu guasgi di modu sanu da abitanti chì sustiniani l'iniziativa di l'uppusizioni, s'hè fattu rimarcà duranti l'asamini di un raportu chì faci cunnoscia dui riservi, una nant'à a pussibulità tennica di u parking sottu tarra privistu sottu à i novi palazzi, è l'altra nant'à a classifica pussibuli di a Casa Montesoru, tocca da i distruzzioni privisti.
Steti à senta à Ange Rovere, chì hà riagitu di manera corta ma chjara.
