Le groupe frontiste Europe des Nations et des Libertés chahuté à son arrivée à Ajaccio
(A redazzioni d'Alta Frequenza) - Hè cù i mughji di i manifistanti chì i membri di u gruppu frontistu Europe des Nations et des Libertés sò ghjunti ssu marti in mità di ghjurnata in Aiacciu. In fatti, a mubilisazioni s'hè urganizata à l'aeruportu di Campu di l'Oru pà manifistà una scuntintezza dopu a ghjunta nant'à l'isula di un seminariu di u gruppu ENL in u Parlamentu aurupeu. Un cumitatu d'accolta di guasgi 200 parsoni aspittava l'eletti pà falli sapè u so ricusu di vedali ghjunghja in Corsica, cù com'è slogans "I Fascisti Fora" è "I Razzisti Fora". I manifistanti si sò missi dopu à pusà fora pà impidiscia i bus di i raprisintanti di u Front National di parta da Campu di l'Oru. Sò stati ubligati à truvà un'antra suluzioni pà sorta da l'aeruportu, postu chì a strada principali d'accessu hè stata bluccata da dui pini tagliati è caddies ; un ostaculu derisoriu chì hè statu trapassatu di una manera assai faciuli. Pà Anthony Casanova, unu di l'urganizatori di a manifistazioni, s'ellu ci voli à rispittà a demucrazia, hè nicissariu dinò di dì più cà mai chì l'idei di strema diritta ùn ani micca a so piazza in Corsica.
Steti à senta à Anthony Casanova.
