Le SC Bastia dépose plainte pour dénonciation calomnieuse suite à SCB - Nantes
(A redazzioni d'Alta Frequenza) - In un cumunicatu ssu marcuri, u SC Bastia hà annunziatu ch'ellu hà postu una lagnanza ind'u prucuratori di a Republica di Bastia pà falsa dinuncia par via di parolli chì sò stati prununziati dopu à a partita trà u Sporting è Nantes. In fatti, u guardinu di i visitori, Rudy Riou, hà accertatu annant'à l'ondi di una radiu di Nantes in un'emissioni 48 ori dopu à ssu scontru ch'ellu avia ricivutu "grossi petri" quand'ellu si scaldava, petri chì li sariani passati d'appressu à ellu vicinu à a tempia, dicendu chì in Corsica, "hè sempri stata cusì". Ma, a cumissioni di disciplina di a LFP, quand'ellu hà datu a so dicisioni cuncirnendu ssa partita, hà ricusatu ss'accusazioni contr'à u Sporting, postu chì nulla dimustra "cù sicurezza" sicondu a cumissioni i parolli di u guardianu di Nantes, ch'ellu si trattesi d'ughjetti riguarati da ss'ultimu, di i bandi di survighjenza videò o di i spiegazioni di i dui parti, a sola amenda ch'ellu hà avutu u club pà ssu scontru essendu di 1 000 auri par via chì calchissia si sighi ghjuvatu di un laser. Malgradu a classifica di u cartulari da a LFP, u Sporting stima ch'ellu hà subitu "un preghjudiziu sicuru è ch'ellu ùn si pò micca accittà" chì hè a raghjoni di ssa lagnanza, è u so o i so distinatari sarani ditarminati dopu à l'asamini di a lagnanza da un ghjudici.
