Le Secours Catholique publie son rapport annuel sur l'évolution de la pauvreté
(A redazzioni d'Alta Frequenza) - Com'è ogni annu à listessa epica, u Succorsu Cattolicu prisenta u so raportu statisticu nant'à l'evuluzioni di a puvartà in Francia. Un studiu chì si hè arrimbatu nant'à a precarità di i deci ultimi anni grazia à dati racolti da l'accolti ma dinò da tutti i benevulenti chì ani scuntratu i parsoni chì passani pà issi strutturi. È senza surpresa, si custata una crescita di l'attività di l'associu è di i so sfarenti dilegazioni dipartimintali, cù una precarità chì si stalla di modu durevuli. D'appressu à sciffri naziunali, 68% di i famighji scontri sò in situazioni di puvartà maiò ; una puvartà chì tocca d'altrondi di più in più donni soli. Senza surpresa dinò, a spesa maiò chì poni prublema à i famighji hè l'alloghju, cù pighjò in crescita ch'ella sia ind'u parcu HLM cà ind'u privatu, senza sminticà l'effetti di u disimpiecu. Una situazioni difficiuli à assuma pà u Succorsu Cattolicu di Corsica Suttana, chì prova com'ellu pò à cuntintà u più parsoni pussibuli ind'u bisognu. Una struttura chì manca di benevulenti è chì furmuleghja torna una chjama à i doni, à l'ora chì i festi di Natali è chì una nova campagna in leia s'avvicinani.
Écoutez Michel Raimondo, délégué départemental pour le Secours Catholique de Corse-du-Sud.
