Le tourisme, vrai moteur de l'économie corse ?
(A redazzioni d'Alta Frequenza) - I servizi di l'INSEE, in partenariatu cù quilli di l'ATC ani publicatu un studiu annant'à u pesu di u turisimu inde l'ecunumia corsa. È ancu s'ella dispiaci à certi, u turisimu ferma u mutori di ss'ecunumia ! In fatti, u turisimu corsu "pesa" oghji pà 31% in Pruduttu Internu di l'isula, assai sopra a media naziunali. Cù 35 millioni di nuttati ogni annu dipoi u 2009, si pò dì chì u turisimu corsu hà trovu u so ritimu, è què in un cuntestu ecunomicu generali assai difficiuli. In fatti, i turisti spendini in media 2,5 milliardi d'auri pà i so vacanzi in Corsica, ma l'INSEE chì hà rializatu pocu fà un studiu impurtanti annant'à ssu tema, custata chì u trasportu è l'alloghju pighjani una parti troppu impurtanti in u so bughjettu di pettu ad altri lochi. In media inde l'isula, un impiegu annant'à deci hè liatu à u turisimu è cù l'allarghera di a staghjoni, raprisenta guasgi 11% di l'impiegu regiunali, bellu davanti à a media naziunali. S'ella s'allonga a staghjoni, u custatu si faci annant'à i sciffri nanzi è dopu a staghjoni, ferma torna largamenti cundiziunata da i vacanzi sculari. Fora di i mesi d'istati, l'avviò hè divintatu oghji u traspurtadori principali di l'isula è a tindenza si cunfirmeghja di più in più. Dominique Subrini hè u presidenti di a cumissioni usservazioni di l'Agenza di u Turisimu di a Corsica.
Eccu ciò ch'ellu pensa di ss'attività.
