Les agriculteurs quittent la Préfecture
(A redazzioni d'Alta Frequenza) - A dilegazioni di i trè camari d'agricultura chì occupava dipoi eri dopu meziornu (marcuri) a prifittura di Corsica in Aiacciu, hà dicisu d'andà si ni in fin di sirata. In fatti, quissi quì, chì dumandani à u Statu di tena i so prumessi pà a Corsica pà ciò chì tocca a pulitica agricula cumuna, ani ricivutu una lettara di u ministru di l'Agricultura. Una lettara assai intarissanti d'appressu à Ghjaseppu Colombani, presidenti di a Camara righjunali d'Agricultura, postu chì parechji punti di primura sò sviluppati nentru di manera pusitiva, pà cuntribuiscia à u richjappu storicu di a Corsica in materia agricula. Prima, l'elegibilità di u parcorsu pà l'aiuti aurupei chì sarani securizati di manera effettiva, è què senza cuefficenti specificu pà a Corsica. Dopu, pà ciò chì cuncerna a cunvergenza di l'aiuti, ciò chì duvaria essa statu toccu in u 2019 in ssu quadru quì, sarà toccu di manera eccezziunali pà a Corsica in u 2015. Altru puntu maiò, un pianu pruteicu mai cunnisciutu in Corsica, da fà chì l'isula pudissi uttena l'autunumia in tarmini di furraghju, cù una pruduzzioni in Corsica grazia à aiuti à l'ettari. Infini, a cunfirmazioni chì u famosu sicondu "pilier", gistitu da l'ODARC, duvaria passà pà l'isula da 93 millioni d'auri à 145 millioni d'auri da u 2014 à u 2020, senza scurdà si di una crescita di l'Indennità Cumpensatoria di Handicap Naturali. Ferma oramai à uttena un tassu di cunvergenza di subbitu specificu à a Corsica, cù neguziazioni da suvità...
