Les études en prison : l'Université de Corse s'engage
(A redazzioni d'Alta Frequenza) - "Un'offesa contr'à i Diritti di l'Omu" ! L'Associu Sulidarità è l'Università di Corsica ani dinunziatu ssu marti, cù ssi parolli, a situazioni fatta in ssu mumentu à Nicolas Battini, ghjuvanottu incarceratu dipoi guasgi dui anni, oghji in Bois d'Arcy. In fatti, quissu quì, pà pudè appruntà a so riinserzioni futura, hà sceltu di ripighjà i so studii, in prighjoni. Dopu avè avutu un diplomu d'accessu à i studii universitarii, s'hè scrittu in doppiu licenza Storia-Lingua è Cultura Corsa à l'Università di Corsica, pà pudè suvità corsi pà currispundenza. Ghjudichendu chì i cundizioni pà pudè riceva un veru insignamentu ùn sò micca riuniti à parechji nivelli in Bois d'Arcy, l'avucati di Nicolas Battini ani dumandatu u trasferimentu di u so clienti in un'antra prighjoni, più adattata. Una dumanda chì hè stata ricusata da u ghjudici è l'amministrazioni penitenziaria par via chì un'antra parsona, incarcerata in ssa listessa prighjoni, saria incausata ind'u listessu cartulari cà u ghjuvanottu. Un argumentu chì ùn teni micca d'appressu à l'Associu Sulidarità chì s'hè mubilizatu à fiancu à a cumunità universitaria pà fà cunnoscia ssa situazioni à l'upinioni publica, ma dinò pà lampà una chjama à u ghjudici è à l'amministrazioni penitenziaria annant'à ssu fattu pricisu. Un sustegnu, è maiò, hè statu arricatu ssu marti inde ss'affari, quillu di u presidenti di l'Università di Corsica. Una situazioni assai difficiuli pà Paul Marie Romani chì hà amintatu ssu casu duranti u cunsighju d'amministrazioni di l'Università, cù una dumanda sulenna fatta à a ghjustizia da fà chì quissa quì dessi tutti i so diritti à Nicolas Battini di pudè studià in prighjoni.
Steti à senta à Paul Marie Romani, u presidenti di l'Università di Corsica.
Sur le même sujet
