Les transporteurs adhérents de la CGPME interpellent les élus territoriaux sur le surcoût du fret Corse-Continent
(A redazzioni d'Alta Frequenza) - À u mumentu chì i cunsighjeri tarrituriali s'approntani pà vutà un testu novu cuncirnendu l'Ubligazioni di serviziu Publicu ind'u marittimu, è à calchì ghjornu di a missa in serviziu di a nova DSP u 1a di ghjinnaghju, parechji parsoni facini cunnoscia u so timori di pettu à a situazioni difficiuli ind'i trasporti marittimi. Hè u casu par asempiu di i traspurtadori chì facini parti di a CGPME Corsica, a Cunfederazioni di l'intrapresi chjuchi è mezani di Corsica, pà ciò chì tocca particularmenti à a missa in opara di ssa futura Dilegazioni di Serviziu Publicu. Ind'una lettara, ss'ultimi lampani una chjama à l'eletti tarrituriali nant'à u costu in più pà u trasportu di i marcanzii viaghjendu trà a Corsica è u cuntinenti. Ssi traspurtadori ani ricivutu in fatti un avisu di i dilegatarii fendu sapè chì u prezzu di u trasportu di i marcanzii nant'à Marseghja chì farà parti di a futura DSP à partasi di u 1a di ghjinnaghju di u 2014 duvaria essa più caru cà quillu chì hè statu vutatu prima. Cù ss'avisu c'hè dinò in più un ducumentu nant'à i mudalità di a carica in più à u nivellu di u cumbustibuli chì i dilegatarii volini dumandà à i traspurtadori è dunqua à i so clienti isulani. Una situazioni chì ùn pò micca essa accittata da i traspurtadori di a CGPME, com'è a ci spieca Philippe Pasqualini, 1a vici presidenti righjunali è presidenti di a CGPME di Corsica Suprana.
Steti à senta à Philippe Pasqualini.
