Libera me, "Ribelli", une bande dessinée corso-irlandaise
(A redazzioni d'Alta Frequenza) - Pudeti ritruvà à partasi d'oghji in libraria, Libera Me, una figuretta "splusiva" di u Corsu Frédéric Bertocchini è di l'Irlandesi Miceal O'Griafa pà u scenariu, disegnata da Michel Espinosa è missa in culori da Pascal Nino. Issu thriller puliticu, ci porta ind'a storia ricca d'avenimenti di a Corsica è di l'Irlanda à u principiu di l'anni 80. Pà issi tempi di cuntestazioni pulitica è di militantisimu, un Corsu, François-Marie Filippi, militanti attivu di u FLNC, è un Irlandesi, Liam O'Connolly, ghjuntu in vancanzi nant'à l'isula, s'ani à scuntrà è ani da veda i so distini liati pà u sempri. François-Marie custrettu à l'esiliu in Irlanda, scighjarà d'impignà si ind'i lotti di l'IRA. Liam, à principiu senza cunscenza pulitica vera, raghjunghjarà u FLNC. Ognunu nant'à l'isula di l'altru, i 2 omi ani à cullà à lestra i piani rivuluziunarii. Issu primu tomu Ribelli, porta u lettori ind'a storia cuntempuranea appassiunanti, di a Corsica è di l'Irlanda (morti di Bobby Sands, alizzioni di François Mitterrand, Riacquistu,...). Da scopra dunqua, issa seria hè privista in trè tomi ind'è l'edizioni DCL.
Sur le même sujet
