Mairie d'Ajaccio : mise en place de la délégation spéciale nommée par le préfet
(A redazzioni d'Alta Frequenza) - U passaghju di puteri stamani (marcuri) in a merria d'Aiacciu trà a dilegazioni spiciali scelta da u prifettu è u Prima aghjuntu di a cità s'hè passatu in calchì minuta. Com'ellu era privistu, hè bè André Valat, anzianu presidenti di a Camara righjunali di i Conti chì purtarà ssa nova squadra dirighjenti di a Cità impiriali. Ci ritruvemi dinò, à mezu à parsunalità abbastanza cunnisciuti, Paul Andreani chì hè statu duranti un tempu longu direttori in a prifittura di Corsica o ancu Laurent Calvet, anzianu altu funziunariu. S'è u passaghju di puteri s'hè fattu in furia cù un discorsu assai cortu di i dui parti, a dilegazioni s'hè missa à travaghjà subbitu subbitu, parchì gistiscia una cità di più di 60 000 abitanti dumanda un impegnu sanu è d'ogni ghjornu. Ci hè vulsutu par asempiu à metta in ballu assai in furia i rispunsevuli di certi dilegazioni, statu civili frà altru, incaricati d'arrigulà prublemi più cà urghjenti. Nanzi à a cunfarenza di stampa di a dilegazioni chì sarà urganizata dopu meziornu, Stéphane Sbraggia, l'anzianu Prima aghjuntu, ci hà datu u so parè.
Steti à senta à Stéphane Sbraggia.
