Manoeuvres électorales de la majorité municipale selon Inseme per Bastia : un agent de la CAB témoigne
(A redazzioni d'Alta Frequenza) - Duranti una cunfarenza di stampa a dumenicata scorsa, Inseme per Bastia, purtatu da u so leader Gilles Simeoni, hà vulsutu dinunzià certi cumbriculi di a maghjurità municipali. Sicondu un custatu d’usceru chersu da u currenti d’uppusizioni municipali, nant’à 19 786 elettori scritti in Bastia, 1 638 ùn ani micca ricivutu a prupaganda eletturali di i legislativi di u 2012 postu chì a parsona ùn stava micca à l’indirizzu datu. Un sciffru chì raprisenta 8% di l’elettori bastiacci, un affari più forti cà in Aiacciu chì t’hà un sciffru di 5%, ciò chì à parè d’Inseme per Bastia dimostra l’affari stranu è una pussibuli mancanza di sincerità di i listi eletturali. Altra prublematica trattata, quilla di l’elettori ditti migranti. D’appressu à Inseme per Bastia, a maghjurità saria intruta in cuntattu cù merri di cumuni duva a rializzioni hè guasgi assicurata da trasferiscia calchì elettori andendu li à prò nant’à a cumuna di Bastia. Infini, quissi quì ani dinunziatu i prissioni chì sariani rializati, frà altru, nant’à i precarii è i parsunali municipali. À mezu à i parsoni chì sariani vittimi di prissioni, un impiegatu di a Cumunità d’Agglumerazioni di Bastia, José Giabiconi, hà vulsutu dà a so testimunianza. À 55 anni è pudendu pratenda di modu automaticu à una prumuzioni in soldi, quissu quì ùn hà micca cunnisciutu issa sorti. Un’assenza di prumuzioni ch’ellu pensa micca liata à i so qualità di travaghjadori, essendu par contu soiu senza rimprovari à issu sughjettu, ma piuttostu à u fattu ch’ellu hè statu vistu à un meeting di Gilles Simeoni è d’avè incollatu affissi par ellu. Iss’agenti affirmeghja chì omu l’hà fattu capiscia ch’ellu ùn era micca statu prumossu par via di u so sustegnu à Gilles Simeoni
On l'écoute.
Sur le même sujet
