Manuel Valls : réponse sereine de Gilles Simeoni
(A redazzioni d'Alta Frequenza) - Bernard Cazeneuve, u ministru di l'Internu, era in visita in Corsica ssu marcuri. S'hà da incalcà assai annant'à u qualificativu "ministru di l'Internu", parchì quissu quì hà urientatu a so visita solu annant'à u latu securitariu è di u rispettu di u Statu di dirittu. Assai ghjurnalisti in fatti aspittavani u ministru di l'Internu annant'à tuttu altru affari, un affari chì ùn trattaria micca di a situazioni difficiuli di ss'ultimi ghjorni, liata à l'agressioni contr'à i spinghjifochi d'Aiacciu è l'evenimenti chì sò stati inghjinnati. A visita di un ministru di l'Internu in u cuntestu puliticu attuali ch'ella campa a Corsica è a presa di puteri à l'Assemblea di Corsica da un cualizioni naziunalista, t'avia un'impurtanza propiu particulari. È annant'à ssu puntu quì, si pò dì chì tutti i ghjurnalisti ùn sò micca stati sazii. À nisun mumentu in fatti, fora di un salutu republicanu cortu, Bernard Cazeneuve hà amintatu ssa situazioni pulitica nova ; ùn era micca l'ughjettu di a visita di sicuru, ma tuttu u mondu aspittava ch'ellu amintessi ssu cambiamentu puliticu maiò è dessi calchì picculi infurmazioni annant'à i raporti futuri trà u Statu è a Corsica. D'appressu à Gilles Simeoni, l'ultimi parolli di Manuel Valls sò distinati piuttostu à a Francia sana inveci di a Corsica.
Eccu l'intervista di u presidenti di l'Esecutivu, annant'à a percezzioni attuali ch'ellu t'hà u guvernu annant'à i cosi di a Corsica è soprattuttu quilla di u Primu ministru.
Sur le même sujet
