Mesures nationales contre la Xylella Fastidiosa : satisfaction mais prudence en Corse
(A redazzioni d'Alta Frequenza) - Stéphane Le Foll, u ministru di l’Agricultura hà presu in fin di sittimana scorsa misuri naziunali cuncirnendu a Xylella Fastidiosa è u risicu di cuntaminazioni in Corsica. I servizi di u Statu ramentani chì « par avà, nisun traccia hè stata trova in Francia ». Malgradu tuttu, « cuscenti di u risicu impurtanti d’intruduzzioni di ssu periculu sanitariu cù cunsiquenzi ecunomichi assai putenti pà i filieri vegetali francesi è di pettu à a vicinanza di certi regioni com’è a Corsica à i lochi taliani tocchi, Stéphane Le Foll hà dumandatu, à partasi di u 16 di ghjinnaghju, misuri aurupei » prima di cuntinà chì aspittenduli, u ministru hà bè dicisu di pighjà misuri naziunali. Hè cusì chì « un arrestu hè statu firmatu vennari, prima d’essa publicatu sabbatu pà pudè pruibiscia l’impurtazioni in Francia di vegetali sinsibuli à a Xylella Fastidiosa è chì ghjunghjini da parti tocchi da ssu batteriu ». Ss’interdizzioni cuncerna i scambii intraaurupei da a regioni di i Pugli è l’impurtazioni di paesi terzi (par asempiu i Stati Uniti, u Brasili, u Giapponi). Aghjustatu à què, c’hè u rinforzu di u pianu di cuntrollu è di survighjenza annant’à tuttu u tarritoriu naziunali. Una riazzioni di i servizi di u Statu chì faci piacè di sicuru à u cullittivu Xylella Fastidiosa, chì scuntrarà da un’antra banda u diputatu aurupeu José Bové, sinsibulizatu à ssa prublematica, duranti una visita in Bastia u 25 d’aprili.
Steti à senta à Saveriu Luciani, membru di u cullittivu è cunsighjeru tarrituriali Femu a Corsica.
Sur le même sujet
