Mobilisation lycéenne en Corse : la réaction du recteur d'académie
(A redazzioni d'Alta Frequenza) - I liceani di tutti i stabilimenti di Corsica sò mubilizati dipoi ssu marcuri, à fiancu à u sindicatu Ghjuventù Indipendentista, pà fà cunnoscia a so scuntintezza di pettu à a situazioni pulitica attuali di l'isula. Facini ricullà u so timori pà ciò chì tocca l'annunzii di u guvernu cuncirnendu a lingua corsa, u statutu di residenti ma dinò è soprattuttu dopu à a dicisioni di u Cunsighju custituziunali chì hà cinsuratu torna una volta u dispusitivu d'esunerazioni di i diritti di successioni. I licei sò stati bluccati stamani ; in Aiacciu, parechji centinai di ghjovani si sò aduniti davanti a prifittura di Corsica, blucchendu a circulazioni, brusgiendu rumenzuli è usendu fumigeni. U rettori d'Accademia hà vulsutu riagiscia dopu à ssi mubilisazioni sfarenti. S'è pà Michel Barat, "si pò bè capiscia ed hè ancu meghju chì i liceani s'intarissessini à a vita di a so Cità, ùn si pò micca accittà chì a prima libertà, quilla d'andà è di vena, sighi mandata à caternu. Ind'una demucrazia, hè indispinsevuli chì l'accessu à i stabilimenti sculari sighi tutalmenti libaru". È di compia chì "s'è ssa situazioni chì si pò rigretta duvia durà, sariami in dirittu d'intarrugà ci nant'à i veri mutivazioni di certi manifistanti. A so azzioni t'avaria com'è scopu di sprima un'upinioni o piuttostu un mezu par ùn andà micca à a scola".
Sur le même sujet
