Municipales 2014 à Bastia : Emmanuelle de Gentili conduira sa propre liste PS
(A redazzioni d'Alta Frequenza) - L'unioni di a manca in Bastia hè oramai un ricordu bellu luntanu. Dighjà indebbulita da a dissidenza di François Tatti, si pò dì avà chì pà u primu ghjiru in tutti i casi, quissa quì hè schjattata. In fatti, Jean Zuccarelli è François Tatti sò raghjunti ind'a battaghja da Emmanuelle de Gentili. Quissa quì, è dunqua di fattu u Partitu Sucialistu, ùn hà micca participatu à l'ultima riunioni stamani (luni) chì hà adunitu solu u Partitu Radicali di Manca, chì sarà raprisintatu da Jean Zuccarelli à i municipali è u Partitu Cumunistu, chì pari lià si à ss'ultimu. Ind'una lettara mandata à i so anziani partenarii, a presidenti di a federazioni PS di Corsica Suprana spieca chì, pà u partitu, i cundizioni di una riunioni di i trè parti ùn sò micca quì, è chì "di pettu à u cuntestu lucali è righjunali", u Partitu Sucialistu hà dicisu di purtà una lista à i municipali chì venini in Bastia pà insista nant'à i so valori di manca è fà vincia l'idei prugressisti", dicendu si apartu malgradu tuttu à qualsiasi forma di dialogu. Si pò pinsà dinò chì i neguziazioni nant'à, par asempiu, a presidenza di a cumunità d'agglumerazioni di Bastia in casu d'alizzioni di Jean Zuccarelli com'è merri di Bastia forsa sò fiascati, postu chì a CAB era u scopu principali di a cunsighjera esecutiva.
Sur le même sujet
