Municipales 2014 à Bastia : François Tatti acerbe envers Jean Zuccarelli
(A redazzioni d'Alta Frequenza) - C’era ssu marcuri u primu di i dui grandi meetings di campagna di François Tatti, candidatu di manca à i municipali di Bastia, ind’una sala pulivalenti di Lupinu guasgi piena com’è quandu Jean Zuccarelli hà fattu u so meeting a sittimana scorsa. L’uccasioni pà François Tatti, in alternenza à a tribuna cù Emmanuelle de Gentili, di prisintà u so prugramma. Suciali, ecunumia, securità, circulazioni, cultura, turisimu è altri sughjetti sò stati trattati ind’u ditagliu cù parechji prughjetti ammintati. Ma ssu meeting sarà statu dinò l’uccasioni pà u duettu d’attaccà parechji volti è cù una certa forza Jean Zuccarelli, candidatu ufficiali di a municipalità attuali chì porti un’unioni PRG-PC. Mentri chì Emmanuelle de Gentili hà dittu, par asempiu, ch’ella ùn difindia micca, cù François Tatti, « una citadella famigliali », ss’ultimu hè statu di un’irunia putenti à a fin di u meeting, dicendu chì Jean Zuccarelli « hè ghjuntu, hà presu u travaghju di l’altri, hà dittu eccu ciò ch’emi fattu, vuteti pà noi, emi da cuntinuà », François Tatti cuntinuendu cusì lachendu cù un certu scherzu à Jean Zuccarelli a paternità di a missa in musica di u focu d’artifiziu di u 14 di lugliu. Infini, ind’i so parolli, u candidatu di manca hà apartu appinuccia a porta à cunvergenzi pussibuli cù Gilles Simeoni pà u sicondu ghjiru.
Steti à senta à François Tatti.
