Municipales 2014 à Bastia : François Tatti appelle au vote utile à gauche au 1er tour
(A redazzioni d'Alta Frequenza) - In un cumunicatu, unu di i candidati di manca à i municipali di Bastia, François Tatti, è a so cumpagna di lista Emmanuelle de Gentili, chjamani à un votu « utuli » à manca nant’à a so lista à partasi di u primu ghjiru. Par elli, si tratta di « una scelta trà dui visioni di a pulitica è di l’avvena di Bastia : una visioni dinastica è chjosa nant’à i scelti di u passatu », quilla di Jean Zuccarelli, « è una visioni dinamica, aparta è prugressista », a soia. François Tatti è Emmanuelle de Gentili si difinisciani com’è i raprisintanti di « una manca capaci d’aduniscia u so campu è aldilà ». Nant’à i perspettivi di sicondu ghjiru, u duettu priciseghja ch’ellu ùn sarrarà nisun porta, « fora di quilli chì com’è Jean Zuccarelli è u so partitu, volini guvernà soli è viaghjani cù sclusioni, quilli chì ani dichjaratu chì ùn ci saria micca « replâtrage ». Altra pricisioni impurtanti, si pò capiscia chì pà François Tatti è Emmanuelle de Gentili, i cunvergenzi t’ani i so limiti parchì quissi quì insistini nant’à u fattu chì nimu ùn devi cuntà nant’à elli « pà stallà à Gilles Simeoni o à Jean Louis Milani ind’u futtogliu di merri di Bastia ». Infini, u duettu, chì prisintarà a so lista luni, dici ch’ellu hè « prontu ad aduniscia ma micca à tradiscia l’alittori bastiacci : Bastia hè à manca à u so merri devi essa di manca ».
