Municipales à Bastia : François Tatti demande à Jean Zuccarelli de se retirer
(A redazzioni d'Alta Frequenza) - A campagna di i municipali in Bastia hè a prima di a storia bastiaccia à veda belli parolli distributi à tempu duranti i riunioni publichi è nant’à tela larga di i novi tennulugii. A prova cù a cumunicazioni ssu ghjovi di François Tatti nant’à a reta suciali Twitter, chì hà fattu nascia a surpresa di l’usadori avvezzi d’internet è ancu aldilà. Ci voli à dì chì in 140 carattari, u candidatu dissidenti di manca hè statu putenti contr’à Jean Zuccarelli di una manera propiu scarsa ind’i so parolli. Ind’u so tweet, François Tatti ghjudicheghja chì u « ricusu di a candidatura di Jean Zuccarelli hè prufondu è chì ssu fattu ùn pudarà micca cambià » è li dumanda « di ritirà si pà fà vincia Bastia ». Jean Zuccarelli, più tardi duranti a sirata, hà utilizatu i 140 carattari di a reta suciali, cù un tweet ironicu, dicendu chì « François Tatti, 12% ind’i sundami, dumanda à Jean Zuccarelli, 35%, di ritirà si », dumandendu à tempu à a ghjenti di « circà l’errori ». Una cumunicazioni virtuali chì cunfirmeghja u rincori impussibuli à risolva trà François Tatti è Jean Zuccarelli.
Sur le même sujet
