Municipales à Bastia : la réaction de Gilles Simeoni au sondage
(A redazzioni d'Alta Frequenza) - D'appressu à un sundami rializatu da l'istitutu TNS-Sofres pà RTL è u Nouvel Observateur annant'à 607 parsoni, u futtogliu di merri di Bastia pari alluntanà si più cà mai pà Jean Zuccarelli. In fatti, sicondu ssu sundami, à u primu ghjiru, u scartu trà Jean Zuccarelli è Gilles Simeoni saria minimu, postu chì u candidatu raprisintendu a municipalità attuali racugliaria 34%, contr'à 32% pà u candidatu Inseme per Bastia. Daretu, un terzu omu, François Tatti, saria dinò ellu in pusizioni di mantena si cù 12%. L'inchietudini duvaria crescia ind'è Jean Louis Milani, candidatu sustinutu da l'UMP è l'UDI, chì cù 8% ùn si pudaria micca mantena. Daretu, Eric Simoni, pà Corsica Libera racugliaria 6%, mentri chì Sylvain Fanti è Jean François Baccarelli sariani à 2%. Ssu sundami essendu statu rializatu da u 20 à u 22 di farraghju, Tony Cardi, chì s'hè cacciatu dipoi u tempu, t'avia 4%. À u sicondu ghjiru, qualsiasi u casu pussibuli, Gilles Simeoni vinciaria. Ind'una quadrangularia, cù 40%, battaria à Jean Zuccarelli à 37%. François Tatti à 13% è Jean Louis Milani à 10%. Ind'un casu di un'allienza cù François Tatti, Gilles Simeoni t'avaria un'avanza più impurtanti cù 49% d'intenzioni di votu, contr'à 39% pà Jean Zuccarelli è 12% pà Jean Louis Milani. Infini, Gilles Simeoni vinciaria largamenti un duellu pussibuli contr'à Jean Zuccarelli, cù 55% d'intenzioni di votu contr'à 45% pà u candidatu PS-PRG, propiu in difficultà in ssu sundami.
Steti à senta a riazzioni di Gilles Simeoni, chì voli firmà prudenti ma chì sottulineeghja a dinamica di cambiamentu.
Sur le même sujet
