Municipales : José Filippi explique la démarche Femu Aiacciu, Femu a Corsica
(A redazzioni d'Alta Frequenza) - Ssa dumenica, Femu a Corsica hà prisintatu a so dimarchja pà l’alizzioni municipali d’Aiacciu di u 25 di ghjinnaghju. Una lista chì si chjama « Femu Aiacciu, Femu a Corsica » è chì duvaria essa purtata da José Fiippi. Ùn si tratta micca dunqua di una lista d’unioni naziunalista, com’ellu era statu u casu duranti l’alizzioni scorsa, induva l’autunumisti è l’indipendentisti di Corsica Libera erani aduniti inghjiru à « Aiacciu Cità Nova ». « A lista « Femu Aiacciu, Femu a Corsica » grazia à un prughjettu rialistu è cuerenti, custituisci l’unica alternativa à i pulitichi di diritta com’è di manca chì ùn sò micca stati capaci di risponda à i dumandi di l’abitanti di a nostra cità. A lista d’unioni di a famighja naziunalista chì era stata purtata di marzu scorsu ùn hè micca stata validata da l’alittori ; hè par quissa ch’è no avemi dicisu, oghji, di scrivaci di manera piena ind’a dimarchja Femu a Corsica iniziata in u 2010 », si pò leghja in un cumunicatu publicatu arimani. « I risultati di u prima ghjiru ditarminarani l’accordi pussibuli. S’è i cundizioni pulitichi a parmettini, pinsaremi annant’à a basa di un cuntrattu di mandatura chì sarà passatu in trasparenza tutali, à sparta i rispunsabilità cù quilli chì raghjunghjini a nostra visioni di a Corsica annant’à punti chì sò in dibattitu in ssu mumentu », compii Femu Aiacciu, Femu a Corsica.
Steti à senta à José Filippi.
