Nouveau mode de scrutin: effort important de communication des préfectures
(A redazzioni d'Alta Frequenza) - Hè l’inchietudini, o in tutti i casi pensani assai à st’affari i servizi di u Statu aspittendu l’alizzioni municipali chì venini. In fatti, aldilà di a scrizzioni di tutti i candidati ind’i prifitturi o sottu prifitturi di Corsica, ciò chì ùn era micca u casu prima pà i cumuni di menu di 3 500 abitanti, si poni dinò a dumanda di sapè s’è u simplici alittori hà da capiscia bè a nova manera di vutà. Ci voli à rammintà chì a legi di maghju di u 2013 hà intruduttu cambiamenti maiò ind'u modu di scrutinu è par asempiu ind'i cità trà 1000 è 3500 abitanti. Rammintemi dinò chì una cumuna fin'è 1000 abitanti, a manera di vutà ùn cambia micca, fora di u fattu chì: una pezza d'identità sarà ubligatoria pà vutà ; a dichjarazioni di candidatura sarà ubligatoria ; sarà impussibuli di vutà pà una parsona chì ùn hè micca candidata. Pà i cità di più di 1000 abitanti, i cunsighjeri municipali ùn sarani più eletti à u scrutinu maghjuritariu com'è prima ma à u scrutinu di lista bluccata, vali à dì chì sarà impussibuli di caccià nomi di una lista pà metta ni altri di fora. Ci voli à pricisà ghjustu appuntu, ed hè assai impurtanti, chì a minima traccia nant’à ogni bigliettinu annularà quissu quì. Una nuvità pà ssi cumuni, si vutarà à tempu pà cunsighjeri cumunutarii chì farani parti dunqua di i cumunità d'agglumerazioni, urbani o metropoli. Rammintemi ch'elli erani fin'è tandu numinati solu. Pà i cumuni di più di 3500 abitanti, a manera di vutà ùn cambia micca ma ci sarà una nuvità maiò : i cunsighjeri cumunutarii ùn sarani più numinati ma eletti. Un sforzu impurtanti di cumunicazioni hè statu intrapresu da i prifitturi.
Steti à senta à Michèle Giudicelli, raprisintanti numaru unu di u scagnu di l’alizzioni è di a rigulamentazioni ind’a prifittura di Corsica Suttana.
Sur le même sujet
