Nouvelle architecture territoriale : réaction de Jean Zuccarelli
(A redazzioni d'Alta Frequenza) - L’Assemblea di Corsica hà dunqua dittu di sì vennari à sera à u prughjettu di criazioni di una cullittività unica pà a fusioni di i dui dipartimenti è di a CTC attuali. A cullittività nova sarà raprisintata da 63 eletti è l’anziani dipartimenti da un culleghju, un cunsighju di i tarritorii, chì duvaria pighjà a forma di un stabilimentu publicu. Ramintemi chì u prima testu hè statu spiccatu in trè lati maiò, ciò chì hà parmissu di sguassà i sfarenzi di punti di vista annant’à sughjetti assai difficiuli pà truvà un accunsentu. A prima deliberazioni hà purtatu dunqua annant’à ciò ch’è no emi chjamatu l’architettura di a struttura nova, un’assemblea è un cunsighju di i tarritorii, a siconda nant’à a manera nova di vutà è a terza infini annant’à u calendariu. Ùn si pudia guasgi micca risolva subbitu u prublema di u calendariu, ed hè statu dicisu dunqua di mettalu da cantu pà pudè renda più faciuli l’avanzata di i dui altri punti. Pà l’architettura, ramintemu u votu : 42 à prò, 8 contru è un’eletta chì ùn hà micca datu u so parè. A diritta hà racoltu 9 voti annant’à 12 pà ssu prima puntu di primura ma ùn hà micca validatu a nova manera di vutà. Appena com’è una surpresa, u gruppu Gauche Républicaine hà vutatu dinò pà a cullittività unica ma ùn hà micca accittata mancu ella a manera nova di vutà. Postu ch’ellu faci parti di l’Esecutivu, Jean Zuccarelli ùn hà micca participatu à u votu, ma u so gruppu iè.
Steti à senta à Jean Zuccarelli.
