Nuit d'horreur à Paris
(A redazzioni d'Alta Frequenza) - L'urrori in Parighji. Setti attacchi tarruristi à u minimu ani toccu a capitali arisera (vennari), fendu, sicondu l'ultimu bilanciu, 128 morti è 250 feriti frà i quali 99 in urghjenza assuluta. A più murtali hè accaduta in a sala di spettaculu di u Bataclan, mentri ch'ellu c'era un cuncertu. 82 parsoni à u minimu sò morti. Un locu induva parsoni sò stati ritinuti duranti più di trè ori, prima chì l'omi di a BRI tumbessini i malfattori. Ci sò stati altri attacchi, soprattuttu in u 10imu è l'11imu arrundissamenti di Parighji, eppo vicinu à u Stadiu di Francia duranti a partita Francia-Alimagna, cù dui splusioni da rimarcà è quì dinò vittimi numarosi. U Presidenti di a Republica, François Hollande, hà lanciatu u statu d'ughjenza è dicisu di sarrà i fruntieri. In Corsica, u prifetu devi aduniscia in principiu di dopu meziornu un Statu maiò di securità. Candidati numarosi à l'alizzioni tarrituriali ani riagitu dinò. Jean Zuccarelli, Emmanuelle de Gentili, a lista PCF-Front de Gauche, Jean-Charles Orsucci, José Rossi, Corsica Libera, Camille de Rocca Serra, Paul Giacobbi è Femu a Corsica ani cundannatu ss'atti è tistimunià a so cumpassioni pà i vittimi è i soi. Ani dicisu di suspenda a so campagna pà un certu tempu. Listessi riazzioni inde u mondu assuciativu pà Per a Pace è Avà Basta. Infini, u cleru di a Catedrali d'Aiacciu pruponi à tutti un'adunita in a Catedrali à 5 ori, pà un tempu di prighera silenziosa, fin'è l'ora di a messa à 6 ori. À meziornu è à 7 ori, sunarà u murtoriu.
Sur le même sujet
