Padduc et agriculture: un même ensemble
(A redazzioni d'Alta Frequenza) - L'assemblea di Corsica hà dunqua dittu di sì cù una maghjurità assai forti, i cumunisti sò stati i soli da cantu, à l'urientazioni strategichi agricultura, sviluppu rurali è furesta. Un raportu chì forsa pà a prima volta pensa à l'agricultura com'è un veru puntellu di sviluppu, è micca solu com'è un'attività sicundaria pà un antru sviluppu chì saria solu turisticu. Pari chì i redattori di u prughjettu, ind'una discussioni longa di parechji mesi, avissini presu calchì millai di foghji bianchi pà scriva torna un avvena pà l'agricultura corsa. L'appruntera di a nova pulitica agricula cumuna aurupea, a famosa PAC, hè in traccia d'essa ridifinita pà 2014-2020 ed hè dunqua avà chì a Corsica devi fà valè è prupona un prughjettu cuerenti di sviluppu agriculu. L'urientazioni strategichi volini dunqua metta u prublema di u fundariu in prima ligna di i pruposti; ci vularà tandu à pruteghja, ammaistrà è mubilizà u fundariu. I carti sò dighjà nant'à a tola: u sviluppu agriculu ùn pò mancu appena essa spiccatu da u sviluppu di a Corsica è sarà un elementu ditarminanti di u PADDUC. Sicondu puntu di primura: migliurà a furmazioni di i ghjovani è favurizà a stallazioni di ghjovani agricultori; quì dinò ferma à fà un travaghju impurtantissimu. Diversificà a pruduzzioni, fà crescia a qualità di i prudutti è migliurà l'efficenza ambientali, vali à dì andà ver di un mudellu agriculu equilibratu sarà u scopu finali. Ma si pudarà pinsà à ssu scopu solu grazia à un rinforzu di l'azzioni tarrituriali è chjarifichendu infini i cumpetenzi pà distrughja l'accumpulera scema di i strutturi. Maria Giudicelli ùn hè micca intarvinutu in ssu dibattitu ma hà presu assai noti; com'è l'emi ditta, u PADDUC è l'agricultura facini parti oghji di tuttu un insemi.
Stemi à senta a cunsighjera incaricata di u pianu di sviluppu durevuli di a Corsica.
Sur le même sujet
