Padduc et défense de l'environnement : les écolos évoquent des pressions
(A redazzioni d'Alta Frequenza) - S'avvicina u mumentu ditarminanti pà u Pianu d'Accunciamentu è di Sviluppu Durevuli di a Corsica, u famosu Padduc. In fatti, l'Assemblea di Corsica hà da asaminà ssu ghjovi in sessioni ssu cartulari pisivu cumpostu d'ottu libretti è di novi annessi tematichi accumpagnati da sfarenti carti, purtatu dipoi guasgi trè anni da a cunsighjera esecutiva Maria Giudicelli è tutta a so squadra. Si trattarà di validà dinò a fini di a terza tappa di u prucedimentu d'elaburazioni di u Padduc, vali à dì a cartugrafia rilativa à u sviluppu futuru di l'isula, à tutti i so nivelli, è chì dimostra tutta a cumplessità di un ducumentu simuli. Si senti di più in più tinsioni pà ciò chì tocca i pusizioni pulitichi di l'uni è di l'altri più ssa data di u 30 d'uttrovi s'avvicina. Inchietudini veri spuntani par asempiu ind'è l'eculugisti, cuncirnendu un puntu particulari di a terza parti di u Padduc, i ZNIEFF, i zoni naturali d'intaressu eculogicu, ma dinò pà l'animali è u vegetali. ZNIEFF di tippu 1 chì l'eculugisti vudariani veda cunsacrati da ssu ducumentu da fà chì i siti chì ci sò rilativi pudissini essa priservati da i custruzzioni immubiliari, malgradu i prissioni chì l'associ di difesa di l'ambienti dinunziani particularmenti.
Steti à senta à Norbert Laredo, raprisintanti d'I Verdi Corsi, chì ci parla dinò di a prublematica di i tarri à vucazioni agrosilvopasturali.
Sur le même sujet
