PADDUC : Femu a Corsica vote pour, mais émet de profondes réserves
(A redazzioni d'Alta Frequenza) - 35, 6, 4, 6 : sò i sciffri impurtanti di u votu di stamani, appena nanzi à dui ori, chì ani datu u ritimu di u dibattitu annant'à u prughjettu di PADDUC chì manda ssu cartulari oramai davanti à l'inchiesta publica. Dopu à quissa quì, à capu di un mesi, o ancu di dui, ssu PADDUC vultarà davanti à l'assemblea di Corsica pà pudè essa vutatu, s'ellu hè u casu, un'ultima volta. Dopu à u ritiru di u PADDUC prisintatu da l'anziana squadra dirighjenti di a CTC, a Corsica t'avarà infini, è dopu à guasgi 30 anni, un ducumentu di prugrammazioni chì hà da difiniscia un sviluppu ecunomicu, suciali è culturali chjaru. U dibattitu di stanotti ùn hè micca statu pà daveru un remake di quillu di u 31 d'uttrovi. In fatti, di vaghjimi, u prughjettu di PADDUC avia racoltu 38 voti, è si custata oghji una piccula perdita. S'è Jean Charles Orsucci hà ricunnisciutu ind'u cuntinutu di ssu PADDUC un veru "tistimoniu di manca", quissu quì hà racoltu dinò l'accunsentu inde i dui gruppi naziunalisti. Corsica Libera, dopu avè dittu ch'ellu hà sempri ghjucatu u ghjocu d'elaburazioni di u testu, hà fattu sapè quantunqua ch'ellu ùn era micca troppu rassicuratu. U gruppu Femu a Corsica, s'ellu hà vutatu u testu dinò ellu, hà vulsutu fà cunnoscia "riservi prufondi". Temi chì, à l'uccasioni di a famosa inchiesta publica, ci sighini prissioni troppu forti annant'à l'integrità di u testu è chì quissi quì ci la fessini infini à dissuchjà a natura di u cuntinutu.
Steti à senta à Ghjuvan Cristofanu Angelini.
