Padduc : la satisfaction de Jean-Marc Venturi
(A redazzioni d'Alta Frequenza) - U Pianu d'accunciamentu è di Sviluppu Durevuli di a Corsica, u Padduc chì hè ormai è dighjà famosu, era torna in discussioni a sittimana scorsa in Aiacciu. Semi intruti in un mumentu assai attivu di u prucedimentu d'elaburazioni parchì a cartugrafia rilativa à u sviluppu futuru di l'isula, à tutti i so nivelli, dimostra di manera publica tutta a cumplessità di un ducumentu simuli. S'hè parlatu dunqua assai di scali di i carti è di u spessori di i tratti chì difiniscini i limiti ind'i sfarenti zoni. In fatti, un trattu di un millimetru annant'à una carta raprisenta una banda di 100 metri annant'à u tarrenu à una scala di u 100 millesimu, ciò chì laca assai pussibilità è intrapritazioni à tutti quilli chì, à gradi diversi, s'intaressani da vicinu à ssi zoni. S'hè parlatu assai dinò di i famosi ZNIEFF, i zoni naturali d'intaressu eculogicu, ma dinò pà l'animali è i vegetali, chì facini cullà torna a tinsioni cù l'associ di difesa di l'ambienti. S'è l'eculugisti s'inchietani, l'agricultori sò cuntenti pà contu soiu. In fatti, u Padduc, ind'a so prisintazioni attuali, hà difinitu zoni di prutezzioni di più di 100 000 ettari di tarri agriculi, ciò chì apri perspettivi di sviluppu pà i vinti anni chì venini à u minimu. Jean Marc Venturi raprisintava u settori agriculu pà ssu dibattitu; ci hà fattu sapè a so cuntintezza.
Steti à senta à Jean Marc Venturi.
