PADDUC : le sentiment de Jean-Guy Talamoni

(A redazzioni d'Alta Frequenza) - Hè cù i sciaccamanati di l'insemi di i cunsighjeri tarrituriali è esecutivi chì s'hè compiu u discorsu di Maria Giudicelli. Quissu quì duvia dà una difinizioni di u mudellu di sviluppu pà a Corsica, prisintendu l'urientazioni maiò è a strategia d'elaburazioni di u PADDUC. Una prisintazioni sana, nanzi à un dibattitu vivu, privistu pà durà fin'è mezanotti. Ind'u so discorsu, Maria Giudicelli hè vultata nant'à u carattaru fundali di u ducumentu PADDUC, ghjaprendu i pussibilità di "un'autodeterlminazioni" di sviluppu è d'accunciamentu. Pà a cunsighjera esecutiva, a nostra isula hè oghji "à un passu di a so storia", ci voli, hà dittu iss'ultima, "à passà da l'ecunumia d'avè ni di più à quilla d'avè ni meghju". Una scelta di sucità, "nè di diritta, nè di manca", s'hè difesa quissa quì. Un cambiamentu chì si devi cuncipiscia "di pettu à i dumandi pupulari" : di più ghjustizia suciali è sulidarità liendu sviluppu è prutezzioni. In calchì parolla, Maria Giudicelli hà ammintatu parechji idei maiò com'è a rispunsabilisazioni di l'attori ecunomichi, a gistioni autonoma è durevuli di u tarritoriu, l'ammaistranza di i risichi...; dunqua a missa in ballu di una guvernenza nova. Da sbuccà ci, hà dittu l'eletta, ci voli prima à rializà un custatu ughjettivu di a situazioni attuali. È l'affari ùn hè tantu bellu : nivellu di precarità altu, sciffru di disimpiecu cunsiquenti, dibbulezza di a pruduzzioni ecunomica è criscenza artificiali nant'à a basa di rivinuti di situazioni. Un sistema sinonimu di risichi maiò pà a sucità isulana. Malgradu tuttu, hà dittu Maria Giudicelli, ùn ci hè micca fatalità ind'a materia, ed hè dunqua pussibuli di "escia di i prucedimenti d'assistanatu chì sterilizeghjani l'iniziativi". Pà què, trè arnesi di primura devini essa mubilizati ind'u quadru d'urientazioni strategichi : quillu di u mantinimentu di i servizii publichi, ind'u rurali soprattuttu, quillu da incuragiscia a criazioni d'attività è quillu di a sulidarità trà di i tarritorii. Un sviluppu durevuli è sustinevuli, eccu l'assi maiò chì sò pruposti, ind'u quadru dinò di trè affari fundatori : ci vularà à pricisà u cuntinutu di i legi "litturali" è "muntagna" ; u sicondu tocca à a cartugraffia chì t'avarà un postu di primura ind'u ducumentu futuru ; infini, certi spazii strategichi duvarani essa identificati. Infini, l'esecutivu, da a voci di a so cunsighjera hà incalcatu nant'à l'ubligazioni di ritruvà un equilibriu di u tarritoriu è u sviluppu forti di l'ecunumia sulidaria, cù a criazioni di una muneta cumplementaria, è a valurisazioni di l'identità, di a cultura è di a lingua. Dui puntelli maiò sò dunqua stati missi à u serviziu di iss'urientazioni, u putenziali umanu com'è risorza prima di u sviluppu o ancu u statutu specificu com'è mutori di quissu quì. Infini, Maria Giudicelli hà ammintatu a quistioni di i mezi da riescia issi scopi cù vii sfarenti. Un spostu longu nanzi à u dibattitu è i riazzioni. I sciaccamanati si sò dinò intesi da u cantu di i naziunalisti di Corsica Libera. Pà Ghjuvan Guidu Talamoni, issu PADDUC, di pettu à u primu prughjettu sottu à l'ecchisi maghjurità, ghjapra daveru "a strada di u sviluppu pà i Corsi è pà a Corsica".

Écoutez-le.