Parking Campinchi à Ajaccio : l'opposition municipale défend avec force son option

(A redazzioni d'Alta Frequenza) - U cunsighju municipali d'Aiacciu hà vutatu a rumpitura di u cuntrattu di dilegazioni di serviziu publicu trà a cità d'Aiacciu è a sucità Q.Park, cù u mutivu di l'intaressu generali. Un votu di a maghjurità municipali allargatu grazia à quillu di José Filippi. Parechji argumenti sò stati ditagliati da u merri è u so 1a aghjuntu. Un argumentu archeulogicu prima, un argumentu ecunomicu dopu, un argumentu ghjurisprudenziali infini. Pà a maghjurità, u cartulari chì hè statu vutatu ancu da ella stessa duranti a mandatura scorsa, s'era scurdatu di parechji costi in più chì facini chì u prughjettu ùn pò micca andà cù l'intaressi di a cità. I costi pà sciappà u cuntrattu ùn sò stati ditagliati, ma sarani, d'appressu à a maghjurità propiu menu impurtanti cà i cunsiquenzi ch'ellu avaria inghjinnatu u fattu di cuntinuà a DSP. A maghjurità voli prisintà dinò un pianu B pà u staziunamentu è a circulazioni, è hà annunziatu dinò ch'ella discutaria da quì à pocu cù a sucità Q-Park pà renda u più prestu pussibuli u square Campinchi à l'aiaccini. Ùn ni semi ancu à l’affari di u « Trou des Halles » in Parighji chì avia fattu nascia una pulemica duranti anni è anni, ma ci ni pudariami avvicinà. U parking Campinchi, chì duvia essa compiu da quì à dui anni à pocu pressu è chì cù u parking di u Diamanti rinnuvatu avaria cambiatu parechji corsi à u nivellu di u staziunamentu in centru cità, faci nascia a pulemica. Stamani (vennari) à 10 ori, ind’a sala di u cunsigliu municipali d’Aiacciu, è in u Grand Café Napoléon, dui squadri municipali, una attuali, è l’altra anziana, ani prisintatu dui visioni di u cartulari propiu upposti. L’uppusizioni municipali, dopu à a vulintà cunfirmata di u merri d’Aiacciu di suspenda u prughjettu, hà vulsutu fà cunnoscia cù forza a so scuntintezza è difenda a so uzzioni. Li saria piaciuta ch’ellu si pudessi lancià in u cunsigliu municipali un veru dibattitu maiò pà andà daveru in u fondu di u cartulari, ciò chì ùn hè micca statu u casu, ciò ch’ellu rigretta assai Paul Antoine Luciani, anzianu prima aghjuntu à u merri d'Aiacciu.

U stemi à senta.