Perspectives financières de la ville de Bastia : la colère de l'opposition
(A redazzioni d'Alta Frequenza) - Dopu à un cunsighju municipali accurtatu pà l’uccasioni, l’eletti di a cità di Bastia ani dibattutu in publicu di i perspettivi finanziarii di a cità cù un studiu di sittanta paghjini prisintatu in introitu. È i so cunclusioni sò chjari : soprattuttu par via di i riduzzioni di i mezi dati da u Statu, l’equilibriu finanziariu di a cità hà da divintà assai debbuli. In fatti, da u 2014 à u 2019, si pirdarà 13,2 millioni d’auri d’aiuti di u Statu, tuttu què cù spesi novi impussibuli à riducia ch’ellu ci voli à gistiscia com’è i ritimi sculari. Vali à dì chì cuntinuà cù u mudelu attuali purtaria a cità di Bastia ver di u fallimentu. È par ùn ghjunghjani micca à ssu puntu, u studiu batti à prò di parechji pussibilità, com’è fà crescia a prissioni fiscali o riducia l’investimenti, ma ssi dui pussibilità, abbastanza radicali, sò dighjà scartati da a municipalità attuali chì ùn voli micca penalizà una cità chì hè dighjà cunsidarata com’è povara. Ci vularà à circà malgradu tuttu un mezu o mezi pà pudè truvà 3,6 millioni d’auri à l’annu pà tena a cità à gallu. È u dibattitu trà a maghjurità è l'uppusizioni hè statu caldu, cù parechji fiacchini, l'elettu d'uppusizioni Francis Riolacci avendu ricivutu da una parsona ind'u publicu un "chjodila" mentri ch'ellu era in traccia d'intarvena. Pà ss'ultimu, hè faciuli pà a maghjurità nova di fà l'ispittori di i travaghji compii è di criticà a gistioni di l'anziana squadra.
Steti à senta à Francis Riolacci.
Sur le même sujet
