Politique : le Partitu di a Nazioni Corsa prône la clarté
(A redazzioni d'Alta Frequenza) - Essa più chjari ! Eccu a brama di u Partitu di a Nazioni Corsa ind'u paisaghju puliticu corsu. Un'idea chì hè stata sviluppata ssa dumenica, duranti una cunfarenza di stampa in Aiacciu. Mentri chì li si pari chì u guvernu ùn pighja ancu a misura di tutti i rivindicazioni purtati da l'eletti di l'assemblea di Corsica annant'à sughjetti maiò com'è a cuufficialità, u statutu di residenti, a fiscalità o ancu a scrizzioni di a Corsica ind'a Custituzioni, u PNC stima ch'ellu c'hè in ssu mumentu un ambienti cunfusu, par via di parechji fattori. U partitu, cumpunenti com'è Inseme per a Corsica è Chjama Naziunali di u muvimentu Femu a Corsica, hà dicisu pà contu soiu di vultà à fundamenti, grazia à una strutturazioni più forti è un ritornu à un'attività militanti propiu sustinuta. S'è par ellu, dipoi a criazioni di Femu a Corsica cinqui anni fà, u dibattitu ùn hà micca cunnisciutu prugressioni pà daveru, è certi scelti eletturali ricenti ani pussutu disturbà parechji parsoni, u PNC voli pighjà tutta a dimensioni chì devi essa a soia com'è struttura stessa, ma dinò nentru à u spaziu Femu. Apprufundiscia u dialogu cù tutti i naziunalisti, rinfurzà i sfarenti arnesi d'emancipazioni naziunali è prupona infini un veru prughjettu di sucità, eccu i trè puntelli essenziali sposti da u Partitu di a Nazioni Corsa.
Steti à senta à Ghjuvan Cristofanu Angelini, u so leader.
