Précarité: la CLE interpelle les candidats à la municipale d'Ajaccio
(A redazzioni d'Alta Frequenza) - A lotta contr'à a precarità devi essa a priurità di i priurità di i puliticanti ! Eccu u sintimu spartutu torna una volta da a CLE, a Cuurdinazioni inter assuciativa di Lotta contr'à a Sclusioni, chì hà dicisu di ghjirà si ver di i candidati à l'alizzioni municipali in Aiacciu annant'à ssa tematica. Di fattu, quissa quì hà mandatu à i setti candidati un quistiunariu chì si prisenta com'è una lettara aparta cuncirnendu a puvartà ind'a so cità. Un quistiunariu riccu cù dumandi annant'à azzioni cuncreti spartuti in trè temi maiò: una manera nova di pinsà a quistioni suciali, a guvernenza di l'azzioni suciali è i scopi priuritarii. Un'iniziativa chì t'hà com'è scopu, d'appressu a Cuurdinazioni inter assuciativa di Lotta contr'à a Sclusioni, di renda più chjara a scelta di l'alittori intarissati da ssa prublematica è pà insista nant'à l'impurtanza di a puvartà ind'a Cità Impiriali. I candidati duvarani trasmetta à a CLE i so risposti nanzi à luni chì veni, da fà chì quissi quì sighini tutti riprudutti, par asempiu nant'à una paghjina Facebook chì sarà in ligna pà u publicu à partasi di u marti l'11 di marzu. A precarità cresci è evulueghja, ciò chì ùn hè micca u casu di i mezi pà luttà contru, com'ellu a ci spieca u duttori François Pernin, u presidenti di a CLE.
Steti à senta à François Pernin.
