Prélèvement de fonds par l'Etat : la chambre d'agriculture de Haute-Corse s'inquiète
(A redazzioni d'Alta Frequenza) - Una riunioni di crisa hè stata urganizata ssu marcuri in camara d'agricultura di Corsica Suprana à l'uccasioni di una ghjurnata à porti sarrati com'è inde tutti l'altri camari d'agricultura. In fatti, u Statu, in leia cù ciò chì era statu fattu cù i camari di cummerciu, hà da prilevà, annant'à trè anni, 90 millioni d'auri ind'u so capitali di funziunamentu di tutti i camari chì contani più di 90 ghjorni di capitali di funziunamentu dispunibuli. A camara di Corsica Suprana t'hà appena di più di 250 ghjorni di capitali di funziunamentu è sarà dunqua tocca da ssa misura in u 2015 cù guasgi dui millioni d'auri chì sarani prilevati. Una scimità pà a camara d'agricultura chì sarà ubligata à truvà soldi pà pudè culmà ssa mancanza, o tandu u so funziunamentu è ancu l'impiegu ind'u casu u più pessimu cunnosciarani cunsiquenzi. Hè par quissa chì Jean Marc Venturi, u vici presidenti di a camara dipartimintali, hà scuntratu à Alain Rousseau, u prifettu di Corsica Suprana calchì ora dopu. È s'è i parolli di u prifettu, par asempiu pà ciò chì tocca i soldi accurdati da u Statu grazia à i mezi di perequazioni, ùn sò micca stati negativi, mancu appena, ùn rassicureghjani micca pà daveru à Jean Marc Venturi.
Steti à senta à Jean Marc Venturi.
