Première réunion du comité de pilotage du port de la Carbonite
(A redazzioni d'Alta Frequenza) - Dopu essa statu assenti di a scena mediatica dipoi calchì mesi, eccu ch'ellu volta u cartulari di u portu di a Carbonita. In fatti, ssu ghjovi c'era a prima riunioni di u cumitatu di direzzioni di u prughjettu, chì hà adunitu u presidenti di l'Esecutivu, Paul Giacobbi, u merri di Bastia, Gilles Simeoni, u presidenti di a CAB, François Tatti, u presidenti di a Camara di Cummerciu è d'Industria di Corsica Suprana, Paul Trojani, u prifettu di Corsica Suprana, Alain Thirion, è altri intarvinanti. L'uccasioni di parlà di sciffri, cù una prima parti stimata à 370 millioni d'auri è chì parmittaria di risponda à i bisogni purtuarii di i vinti anni chì venini, cù a custruzzioni difinitiva di a diga è di una parti, senza avè di più pricisioni, di u portu, u costu glubali di u prughjettu essendu valutatu à 550 millioni d'auri. Di fattu, l'annata 2015 sarà didicata à i sfarenti studii preliminarii chì pudariani cambià a faccia di ssu portu o ancu, in u casu u più stremu, scunsighjanni cù forza a so edificazioni. Dinò, parechji attelli com'è riunioni publichi sarani missi in ballu annant'à i sfarenti tematichi chì toccani a rialisazioni di un portu simuli. Un prughjettu chì faci nascia torna u dubbitu ind'è certi, par asempiu Henri Malosse, chì hà da raghjunghja à Paul Giacobbi pà i tarrituriali. Ma pà Paul Giacobbi, l'essenziali hè di veda avanzà u prughjettu, ciò chì hè u casu oghji d'appressu à ellu.
Steti à senta à Paul Giacobbi.
Sur le même sujet
