Prisonniers, coofficialité, statut de résident : Manuel Valls ferme la porte à toutes discussions
(A redazzioni d'Alta Frequenza) - U Prima ministru Manuel Valls hè statu assai chjaru ssu marcuri à sera in u ghjurnali di TF1, mandendu à caternu tutti l'idei d'avanzati cuncirnendu i cartulari maiò di a Corsica. Intarrugatu annant'à u discorsu in lingua corsa di Ghjuvan Guidu Talamoni, hà rispostu "a Corsica hè ind'a Francia è ind'a Republica. Nisun discorsu, in corsu o in francesi ùn pudarà rimetta in causa ssa leia". Manuel Valls hà annunziatu di sicuru ch'ellu voli discorra cù u presidenti di u cunsighju esecutivu, Gilles Simeoni, annant'à i quistioni chì sò "privisti dipoi parechji mesi oramai", vali à dì "a cullittività unica di a Corsica". Ma Manuel Valls hà amintatu "ligni rossi" annant'à chì "ùn hè micca pussibuli di discorra", fendu rifarenza par asempiu à "l'annistiai di i prighjuneri pulitichi, parchì prighjuneri pulitichi, ùn ci n'hè". Pà ciò chì tocca a cuufficialità linguista, "ùn hè micca pussibuli, c'hè una lingua sola in a republica francesi, hè u francesi". Infini, cuncirnendu u "statutu di residenti", hè "cuntrariu à a custituzioni". Manuel Valls hà dunqua sarratu a porta à tutti i discussioni annant'à ssi quistioni chì erani stati dibattuti è vutati eppuru, u più suventi cù maghjurità assai larghi, ancu nanzi à a vittoria di i naziunalisti a sittimana scorsa, vali à dì duranti a mandatura scorsa di l'assemblea di Corsica. Ssu marcuri à sera, i rilazioni sò dinvitati appena di più difficiuli trà a Corsica è Parighji.
