Prisonniers politiques corses : la pression ne retombe pas
(A redazzioni d'Alta Frequenza) - Cunfarenza di stampa nova di l'Associu Sulidarità ssa dumenica in Aiacciu davanti u purtonu di u Palazzu di Ghjustizia pà alertà l'upinioni publica annant'à a situazioni di i prighjuneri pulitichi, in particulari quilla di Xavier Ceccaldi è di Cédric Courbey. Ramintemi chì i dui omi, incarciarati in Fleury Mérogis, sò dipoi più di una decina di ghjorni oramai in quartieru disciplinariu pà raghjoni chì parini abbastanza scuri è inde cundizioni di ditenzioni particularmenti difficiuli. Di pettu à u mutisimu di a direzzioni di a prighjoni è, di manera più generali, à a pusizioni assai sivera di u Statu nant'à u cartulari di i prighjuneri pulitichi corsi, Sulidarità hà annunziatu à partasi d'oghji u principiu di una campagna d'azzioni di tarrenu, cù com'è parolli maestri "Femu li vultà". I militanti naziunalisti dumandani in ssu sensu a surtita subbitu da a carciara disciplinaria di Xavier Ceccaldi è Cédric Courbey è u trasferimentu subbitu di tutti i prighjuneri pulitichi corsi senza eccezzioni in a prighjoni di Borgu, aspittendu u votu di una legi d'annistia. I famighji di ssi dui prighjuneri pulitichi erani prisenti duranti ssa cunfarenza di stampa; emi scuntratu ghjustu appuntu a cumpagna di Xavier Ceccaldi.
Steti à senta à Elise Gaddini, a cumpagna di Xavier Ceccaldi.
