Prisonniers politiques : la nouvelle majorité territoriale ne lâche rien
(A redazzioni d'Alta Frequenza) - I dui gruppi di a maghjurità tarrituriali nova Femu a Corsica è Corsica Libera ani urganizatu ssu ghjovi dopu meziornu una cunfarenza di stampa nant'à a situazioni di i prighjuneri pulitichi. Cuncirnendu l'assenza d'avvicinamentu di i prighjuneri pulitichi, ani dinunziatu una volta di più una mancanza di pettu à a parolla data, ma dinò à u nivellu di u dirittu ind'è u guvernu. A necessità di un votu di una legi d'annistia di i prighjuneri pulitichi è di i ricircati hè stata amintata torna cù forza, una cundizioni ubligatoria pà un ambienti appaciatu trà l'isula è u Statu. Pà ciò chì tocca u guvernu, è malgradu a fini di a viulenza armata dicisa da u FLNC è u dialogu ingaghjatu da l'eletti corsi, a porta ferma sempri di più sarrata. Un fattu chì Femu a Corsica è Corsica Libera ùn poni tularà. Faci chì i dui gruppi lampani torna una chjama à u Statu pà truvà infini una suluzioni pusitiva, si volini ghjirà ver di u novu ministru di a Ghjustizia, Jean Jacques Urvoas nant'à ssa quistioni eppo u guvernu duranti a riunioni di u 16 di farraghju in Parighji trà a raprisintazioni pulitica isulana è a ministra di a Dicintralisazioni, Marylise Lebranchu.
Steti à senta à Petru Antò Tomasi, u presidenti di u gruppu Corsica Libera à l'Assemblea di Corsica.
