Projet global pour la Corse : la nécessité de se faire entendre à Paris

(A redazzioni d'Alta Frequenza) - L'auditorium di u Palazzu di i Cungressi d'Aiacciu era pienu vennari à sera pà u meeting di a cuurdinazioni pulitica missa in ballu l'annu scorsu cù u scopu di difenda i deliberazioni impurtantissimi vutati da l'assemblea di Corsica. Ma s'hè parlatu soprattuttu di un puntu di gran primura, quillu annant'à una dumanda d'amnistia di i prighjuneri pulitichi corsi. S'è i naziunalisti Ghjuvan Guidu Talamoni, Ghjuvan Cristofanu Angelini è Gilles Simeoni par asempiu erani à a tribuna, si rimarcava dinò a prisenza di l'eletti tarrituriali di manca Jean Baptiste Luccioni è Jean Charles Orsucci, ss'ultimu essendu à l'urighjini di ssa dumanda d'amnistia. Parsunalità di a sucità civili erani quì dinò com'è André Paccou, pà a Liga di i Diritti di l'Omi, o ancu ind'a sala u presidenti di a CGPME Corsica è membru di u cullittivu Dumane da Fà, Jean André Miniconi. Missaghji di sustegnu di Simon Renucci, Maria Giudicelli è Vincent Carlotti, chì ùn ani micca pussutu vena à ssa riunioni, sò stati letti à a tribuna. Ani pinsatu tutti à Petru Paoli, membru di l'esecutivu di Corsica Libera arristatu è missu in asamini dipoi parechji sittimani. Un prughjettu glubali pà a Corsica, è què ind'u filu di tuttu ciò chì hè statu difinitu da l'assemblea di Corsica dipoi più di dui anni oramai, eccu a rivindicazioni maiò prisintata à u publicu da tutti i currenti pulitichi. Eppuru, tuttu u mondu hè d'accordu par dì chì ssa quistioni di l'amnistia hè pà daveru un pegnu ditarminanti pà a paci in Corsica. Jean Charles Orsucci, u merri assai attivu di Bunifaziu, hè di una certa manera à l'urighjini di ssa manifistazioni. Ramintemi ch'ellu hà postu annant'à u scagnu di l'assemblea di Corsica una muzioni firmata cù Jean Baptiste Luccioni è Ghjuvan Guidu Talamoni. U tema di quissa quì, ramintemula dinò, dumanda subbitu à u guvernu o à i gruppi pulitichi di l'assemblea naziunali di riceva una dilegazioni di a Corsica pà pudè amintà tutti ssi quistioni. Fassi senta in Parighji, ferma ind'a situazioni attuali di più cà ditarminanti.

Steti à senta à Jean Charles Orsucci.