Propos de Laurent Marcangeli à l'Assemblée nationale: "un mauvais coup de pub", selon Simon Renucci
(A redazzioni d'Alta Frequenza) - Dopu à i parolli di u diputatu UMP di Corsica Suttana è candidatu à l'alizzioni municipali d'Aiacciu Laurent Marcangeli nant'à u viaghju di u presidenti di a Republica in Corsica à l'uccasioni di i ceremonii di u 70u anniversariu di a Liberazioni di l'isula, marcuri à l'Assemblea naziunali, sughjettu dighjà ammintatu nant'à i nostri ondi, u merri di a cità imperiali Simon Renucci hà vulsutu riasgiscia. "Senza spiritu pulemicu, socu di manera leghjetima propiu surpresu è afflittu da l'intarvinzioni à u Palazzu Bourbon di Monsieur Laurent Marcangeli", dici u merri d'Aiacciu. Cuntinueghja dicendu chì "piuttostu cà d'essa cuntentu di l'annunzii di u presidenti à prò di a pupulazioni aiaccina è aldilà, hà vulustu piuttostu andà nant'à u tarrenu di a critica pulitica. Piuttostu cà d'alzà si à u nivellu di l'inghjocu, hè firmatu ind'un'attitudina eletturalista". Pà Simon Renucci "ss'attitudina traduci una mancanza di una certa visioni pà a circuscrizzioni ch'ellu duvaria raprisintà è difenda dinò. Cuncintratu à più pudè nant'à l'alizzioni municipali, Monsieur Marcangeli sminteca, ed hè gravi pà calchissia chì voli essa u primu magistratu di a cità imperiali u cuncettu d'intaressu ghjinirali, chì com'è tuttu u mondu a sà a basa di a nostra demucrazia." U merri d'Aiacciu dici infini chì "aldilà di ssa prova appena strampalata è chì hè un "gattivu colpu di publicità", u me uppunenti ùn hè micca riisciutu à scantà l'essenziali di l'accessoriu..."
