Protection du patrimoine foncier: l'analyse du président du Comité Economique et Social Européen

(A redazzioni d'Alta Frequenza) - Hè ssu ghjovi chì l’Assemblea di Corsica s’adunisciarà pà discussioni inghjiru à u raportu 51, rilativu à a prutezzioni di u patrimoniu fundariu; si tratta, ben intesu, di u famosu statutu di residenti. À a vigilia di ssu dibattitu, è pà lancià lu appena, pudemi ammintà a deliberazioni presa dui mesi fà da u cunsighju municipali di Cuttuli è Curtichjatu, dicendu chì pà pudè custruiscia annant'à tarreni cumunali, l'acquistadori duviani stà dipoi cinqui anni à u minimu annant'à ssa cumuna quì o i so lochi vicini. Una dicisioni chì, senza surpresa, hè stata annulata da u prifettu, par asempiu par via di u fattu chì ssa deliberazioni ùn rispittessi micca d'appressu à ellu i reguli d'egualità di a Republica Francesi. S'hà da senta parlà assai di ssa regula quì duranti u dibattitu chì veni, parchì sarà à u centru di u prughjettu prisintatu da l'Esecutivu di Corsica. Si prisenta in fatti in dui parti bè spiccati: l'evuluzioni di u quadru attuali d'accessu à a prupietà senza evuluzioni statutaria, è un antru quadru più pulemicu cù quì un'evuluzioni statutaria. In ssu primu quadru, si trattarà di metta in ballu tutta una seria di stuvigli fiscali o micca fiscali parmittendu di migliurà l'accessu à a prupietà pà l'isulani; par andà in furia, si diciarà chì l'Assemblea di Corsica pò prupona o micca a missa in piazza di un statutu di residenti. L'essenziali di u dibattitu sarà dunqua inghjiru à ssa nuzioni quì, è inghjiru à certi cuncetti com'è "dirittu prifarinziali", "appartinenza corsa", o "parsona attaccata à u tarritoriu corsu". A difficultà a più maiò di u dibattitu sarà di sicuru di difiniscia cosa sarà esattamenti a seria di criterii nicissarii chì parmittarà di sapè di manera cuncreta quali hè chì hè ind'u so dirittu o micca. L'uppunenti à ssu prughjettu chì si sò mossi dighjà ani missu in evidenza l'icustituziunalità di ssu prughjettu, è ben intesu u fattu chì l'istanzi aurupei ùn lu pudariani micca accittà. Ghjustu appuntu, l'ostaculu pudaria dinò essa prisenti pà ssu latu quì? Micca daveru, com'ellu a ci dici Henri Malosse, u presidenti di u Cumitatu Ecunomicu è Suciali Aurupeu, ch'è no avemi chjamatu stamani.

Steti à senta à Henri Malosse.