Quelles conséquences pour l'île de la disparition de la représentation corse à Bruxelles ?
Quelles conséquences pour l'île de la disparition de la représentation corse à Bruxelles?
(A redazzioni d'Alta Frequenza) - U tarramottu chì s'hè risintutu in tutta a Francia arisera (dumenica) ùn avarà micca avutu in Corsica a listessa intensità. Di sicuru, u partitu pupulistu è contr'à l'Auropa avarà riisciutu à rializà una cullata più cà significativa parchì hè in l'isula sana subbitu dopu à a famighja liberali. Alizzioni aurupei chì avarani appassiunatu torna menu cà in Francia cuntinintali, postu chì 64,48% di i scritti ùn sò micca andati à vutà, vali à dì di più di pettu à a media naziunali. In Corsica dunqua, u partitu di Marine le Pen suvita da vicinu l'UMP, cù 23,29%. À u terzu postu, c’hè François Alfonsi cù 21,51% pà Régions et Peuples Solidaires, tutti l'altri furmazioni pulitichi essendu sottu à i 10%. Cunsiquenza di a cullata di u Front National in Corsica, cù un risultatu multiplicatu pà quattru di pettu à u 2009, è soprattuttu ind’a circuscrizzioni, nisun diputatu aurupeu corsu andarà in Brussels, François Alfonsi fendu un risultatu troppu debbuli ind’a circuscrizzioni pà tena u so postu, è Franck Giovannucci, cinquesimu di a lista UMP, chì ùn si buscarà micca postu, parchì l’UMP t’avarà solu trè diputati aurupei. S’è in Aiacciu, l’UMP, cù 27,07% hè stata prima cù ondeci voti di più cà u Front National, in Bastia, hè François Alfonsi chì hè passatu davanti à u FN cù setti voti è 26,20%. Franck Giovannucci, a pudiami risenta, è s'annunziava ancu, duvia rimpiazzà "nurmalamenti" à François Alfonsi in Brussels. Ma a sapemi, u risultatu di l'UMP ind'a circuscrizzioni maiò ditta di u Sud Est ùn l'avarà micca parmissu. Chì sarani i cunsiquenzi pà a Corsica di a disparizioni di a raprisintazioni corsa in Brussels?
Steti à senta à François Alfonsi ch'è no avemi scuntratu stamani.
