Questions orales CTC: la Corsisation des emplois en débat
(A redazzioni d'Alta Frequenza) - Sissioni d’istati pà l’Assemblea di Corsica oghji (ghjovi) è dumani. Nanzi à i dibattiti inghjiru à i raporti di l’esecutivu è muzioni, c’erani i tradiziunali quistioni urali stamani. I trasporti stradali è marittimi sò stati ammintati. Ma ancu a prublematica di a Cursisazioni di l’impiechi cù dui dumandi nant’à ssa tematica. Una di Josepha Giacometti, è l’altra di Gilles Simeoni. L’eletta Corsica Libera hè vultata nant’à a crisa mai cunnisciuta è u sciffru di u disimpiecu assai impurtanti in Corsica. Hà ammintatu dinò u fattu chì l’assemblea «hà dittu di sì à l’unanimità à l’urientazioni fundali di un PADDUC chì riponini nant’à un sviluppu internu ». Pà Josepha Giacometti, ùn si pudaria accittà d’ùn pighjà micca in contu i prublematichi cunnisciuti da i corsi pà travaghjà nant’à a so terra ». Stima chì ssa quistioni hè stata « sminticata » duranti l’assisi di l’impiecu. Gilles Simeoni, pà contu soiu, hè vultatu anch’ellu nant’à u fondu di u prublemu, com’è nant’à i pussibilità ghjuridichi ufferti. Pighjendu par asempiu dui cunflitti accaduti pocu fà (société générale et pôle emploi), l’elettu Femu A Corsica hà arrimbatu soprattuttu a so argumentazioni à una legi urganica, quilla di u 29 di ghjinnaghju di u 2004, purtendu nant’à un statutu d’autunumia di a Pulinesia Francesi. Quissa quì ammenta una prifarenza lucali « à paru di meriti ». Femu A Corsica prupunia dunqua chì una cuncertazioni larga sighi ingaghjata inde ssu duminiu. A risposta di l’esecutivu hè stata fatta da Jean Zuccarelli. U cunsighjeru esecutivu è presidenti di l’ADEC hà datu una risposta più tennica cà pulitica.
On l’écoute.
