Racisme anti-corse : Femu a Corsica va déposer une motion lors de la prochaine session de l'assemblée de Corse
(A redazzioni d'Alta Frequenza) - Femu a Corsica voli purtà u dibattitu di u razzisimu "contr'à i corsi" nentru à l'emiciculu di l'assemblea di Corsica. Eccu ciò ch'ellu dici u partitu puliticu in un cumunicatu di stampa. Custatendu chì u razzisimu contr'à i corsi diventa di più in più banali ind'i ghjurnali, i media, eppo oramai par via di l'arresti prifitturali, u muvimentu naziunalistu cunsidareghja ch'ellu ci voli à cuncretizà l'indignazioni cullittiva cù una muzioni chì sarà posta duranti a prossima sissioni di l'assemblea di Corsica. Eccu u cumunicatu di u PNC.
U razzisimu contr'à i corsi ùn hè più di circustanza. S'imponi oramai com'è calcosa di rigulari, in una certa stampa francesi è certi parsoni cù rispunsabilità publichi alti. Ss'ultimi mesi, publicazioni è cumunicai di ghjurnalisti, di rispunsevuli edituriali, di "parsunalità" è ancu d'alti dirighjenti di u guvernu, fendu rifarenza à a Corsica cù parolli di un'esagerazioni prufonda è diffamatorii, si sò multiplicati. A cosa a più ridicula hè stata a sittimana scorsa a publicazioni di l'arrestu di u Prifettu di l'Alpi Marittimi, è l'intedizzioni fatta à i sustenidori di u Sporting di sustena un club è a so appartinenza à un tarritoriu. À ssa misura mancu appena ghjustificata cuncirnendu un club spurtivu, com'è pà u nostru populu, si sò aghjustati i viulenzi contr'à a dilegazioni bastiaccia. Pà u PNC, hè urghjenti oghji di cuncretizà l'indignazioni cullittiva. A muzioni ch'ellu punarà Femu a Corsica duranti a prossima sissioni di l'Assemblea di Corsica, cunghjucata ad altri iniziativi citadini, ghjuridichi è pulitichi, si scrivi di manera chjara in ssa dinamica di ricusu di u razzisimu, è d'affirmazioni di u nostru dirittu à u rispettu è à a dignità.
