Rapport Chaubon: La Gauche Autonomiste critique et propose
(A redazzioni d'Alta Frequenza) - U club di riflessioni puliticu La Gauche Autonomiste hà urganizatu ssu marti da mani una cunfarenza di stampa in Aiacciu, è què dui ghjorni nanzi à a prisintazioni è u votu à l'assemblea di Corsica di u famosu raportu Chaubon, dumandendu a scrizzioni di l'isula ind'a Custituzioni francesi. Sicondu La Gauche Autonomiste, ancu s'è un travaghju impurtanti hè statu fattu da a cumissioni di i cumpetenzi legislativi è rigulamentarii di l'assemblea di Corsica pà rializà ssu raportu, certi mancanzi maiò sò da nutà. Dopu à i trè mudificazioni di statutu chì a Corsica hà cunnisciutu dipoi più di trenta anni, era u mumentu, sempri d'appressu à u club di riflessioni puliticu, di neguzià un veru statutu d'autunumia, arrimbatu à l'articulu 74 di a Custituzioni cù un statutu "à a pulinesiana". La Gauche Autonomiste rigretta dunqua chì ssa dimarchja ùn sighi micca stata scelta, è l'accetta, essendu primurosa à tempu, malgradu a so assenza di raprisintatività pulitica, d'arricà migliurazioni à ssu raportu. Vincent Carlotti, à l'urighjini di ssu club, parla di manera franca è chjara di un novu "bricolage" è dinunzia "a mancanza di curaghju puliticu" di l'eletti di l'assemblea di Corsica in a materia.
Ecoutez-le.
