Recours concernant l'annulation du PLU d'Ajaccio : le sentiment de François Casasoprana
(A redazzioni d'Alta Frequenza) - L'annulazioni di u PLU d'Aiacciu hè statu l'ughjettu di una mediatisazioni impurtanti subbitu dopu chì a nutizia hè stata cunnisciuta. Ci arricurdemi chì à partasi di a mità di nuvembri, u tribunali amministrativu di Bastia ci lacava pinsà à a pussibilità di ss'annulazioni, un affari chì hè statu cunfirmatu un mesi dopu. Ci arricurdemi dinò di a scuntintezza forti di tuttu u mondu puliticu, ecunomicu è assuciativu intarissati à ssa quistioni. Ssu sughjettu assai impurtanti s'hè ficcatu cù forza ind'a campagna eletturali. Ssu tema hè divintatu un ughjettu di campagna impurtanti pà Laurent Marcangeli, chì hà custruitu una parti di a so argumentazioni inghjiru à "l'incumpetenza di certi chì hà inghjinnatu ssa situazioni". In fin di sittimana scorsa, hè intarvinutu un fattu novu impurtanti chì pudaria fà chì ssu PLU ùn sighi infini micca annulatu o in tutti i casi ch'ellu ci sighi un mumentu d'attimpera di un annu pà l'esecuzioni di l'annulazioni. Una bona o una gattiva nutizia quandu omu hè impignatu in una campagna eletturali ?
Steti à senta à François Casasoprana, chì ci dà u so parè.
