Réforme territoriale : la grogne des élus de la montagne
(A redazzioni d'Alta Frequenza) - L'Associu Corsu di l'Eletti di a Muntagna s'hè adunitu in fin di sittimana scorsa in prisenza di l'associu di i merri di Corsica Suprana. Tutti l'eletti di a muntagna ani fattu u listessu custatu annant'à a riforma tarrituriali. S'hè dunqua parlatu d'intercumunalità, di cumpetenzi novi trasferiti, di PLU intercumunali, di difinizioni nova è d'equilibriu novu di i tarritorii, è facini tutti a listessa cunclusioni : ssa riforma si faci in ssu mumentu di manera furzata. Pà l'eletti di a muntagna, mentri chì l'elaburazioni di u PADDUC ùn hè ancu compia daveru, è chì u cumitatu strategicu di l'Assemblea di Corsica ùn hà ancu validatu tutti i scelti, u guvernu cerca à impona a so visioni di i cosi. Ci voli à rifletta torna annant'à parechji scelti, si sò lagnati l'eletti di l'internu : riforma di l'istituzioni, statutu di residenti, i pulitichi publichi, è ani da fà ricullà in ssu sensu a so scuntintezza fin'è u prifettu di Corsica. Hè u fondu quant'è a forma ch'elli accettani mancu appena l'eletti di a muntagna.
Steti à senta à Ghjuvan Filici Acquaviva, presidenti di l'ACEM.
Sur le même sujet
