Régionalisation des dates de chasse : les fédérations de Corse ne lâchent pas le morceau
(A redazzioni d'Alta Frequenza) - Una rivindicazioni di più di deci anni fà ind'è i cacciadori corsi è chì volta annant'à a scena mediatica : a regiunalisazioni di i dati di caccia. D'appressu à elli, ssa misura parmittaria di rimpattà u ritardu arrighjistratu ogni staghjoni di pettu à u cuntinenti pà ciò chì tocca a migrazioni di i culombi. Ssu marcuri, i dui federazioni dipartimintali di cacciadori di l'isula sò stati ricivuti da u presidenti di l'Assemblea di Corsica, Dominique Bucchini, da fà ch'ellu pudissi rilancià u cartulari ind'è u guvernu, intarratu oghji. In fatti, mentri chì ssa quistioni di a gistioni regiunali di i dati d'apartura è di sarratura di a caccia hè stata vutata à l'unanimità da i gruppi di l'Assemblea di Corsica calchì annu fà, ssa dumanda ùn hà vistu nisun risposta intarvena in Parighji, mentri chì una prima lettara era stata mandata in u 2013 à u Prima ministru di l'epica Jean Marc Ayrault, eppo pocu fà à Manuel Valls. I cacciadori, chì scuntrarani da quì à pocu u prifettu di Corsica pà pudè insista torna, dicini ch'elli sò mubilizati è pronti à tuttu da fà chì ssa dumanda sbucchessi infini; l'avvena di a caccia in Corsica hè minacciatu oghji, d'appressu à Paul Ettori, par via di ssu fattu.
Steti à senta à Paul Ettori, u presidenti di a federazioni di i cacciadori di Corsica Suttana.
Sur le même sujet
