Remous à la mairie de Bastia : le MCD de François Tatti communique
(A redazzioni d'Alta Frequenza) - Dopu à u cumunicatu di Gilles Simeoni, Emmanuelle de Gentili è Jean Louis Milani ssu luni à sera, a risposta aspittata di François Tatti, toccu da ssu cumunicatu com'è mittendusi fora da par ellu di fattu di a maghjurità municipali di Bastia dopu à u so passaghju à u cunsighju generali pà filicità a maghjurità dipartimintali ssa dumenica, hè intarvinuta. Ma ùn si pò micca dì ch'ellu si tratta pà daveru di una risposta di François Tatti, ma piuttostu di u so partitu, u Muvimentu Corsu Demucratu. In fatti, a stampa, invitata à una cunfarenza di stampa, hè stata infini cunfruntata à una littura di cumunicatu da u vici presidenti di u MCD, Jean Marc Venturi, François Tatti stendu zittu è ricusendu di risponda à qualsiasi dumanda, com'è tutti l'altri parsunalità di u MCD prisenti. Ferma chì di ssa manera di fà micca abituali escini infurmazioni. A prima cuncerna à Marie Claire Poggi, eletta cunsighjera dipartimintali in Bastia III ssa dumenica cù u so duettu José Gandolfi, vicinu pà contu soiu di Gilles Simeoni. Quissa quì ùn vutarà micca ssu ghjovi duranti l'alizzioni di u presidenti di u cunsighju dipartimintali è farà parti di nisun gruppu. A siconda hè chì u MCD chjama Gilles Simeoni à pighjà i so rispunsabilità pà sorta da ssa situazioni quì, apprufittenduni pà incalcà annant'à i sustegni di Jean Louis Milani à Laurent Marcangeli pà i municipali d'Aiacciu è l'appartinenza d'Emmanuelle de Gentili à u cunsighju esecutivu di Paul Giacobbi.
Steti à senta à Jean Marc Venturi, u vici presidenti di u MCD.
Sur le même sujet
