Rencontre à Paris : le compte n'y est toujours pas pour Femu a Corsica
(A redazzioni d'Alta Frequenza) - Ùn si pò micca dì chì u spiazzamentu di i Corsi in ssu mumentu in Parighji sighi maravigliosu, ch'ella sighi par decini di millai in un stadiu o cù menu mondu sottu à l'ori di a Republica. Ind'u primu casu, ci semi fatti arrubà più o menu è ind'u sicondu ùn semi micca luntanu d'essa stati ingannati. Fora di una riforma di i dipartimenti, chì di tutti i manera sarà appiecata in Francia sana da quì à dui o trè anni, nulla ind'u cartulari cunsiquenti è cusistenti prisintatu da l'eletti di l'Assemblea di Corsica è i parlementarii di l'isula hà avanzatu pà daveru oghji. Duranti a riunioni trà u ministru di l'Internu è quilla di a Dicintralisazioni, u currenti ùn hè micca passatu di manera pusitiva oghji (luni). In fatti, cuufficialità, statutu di residenti, fiscalità, revisioni custituziunali, nisun dumanda furmulata di manera chjara da l'Assemblea di Corsica hà ricivutu l'accunsentu di u guvernu. I naziunalisti ùn ani micca mughjatu, ma guasgi. Sicondu Jean Guy Talamoni, "i cosi ùn si sò micca passati bè" parchì u guvernu ferma annant'à i so pusizioni; a sola riforma pussibuli pà a Corsica hè a riforma di i dipartimenti cù una fusioni in cullittività unica. Pà u raprisintanti di Corsica Libera, ssu puntu hè impurtanti, ma ùn hè micca l'essenziali di u cartulari. Ind'è Femu a Corsica, hè appena a listessa pusizioni. U muvimentu hà ripresu a listessa furmulazioni chì era stata aduprata duranti scontri scorsi cù i listessi parsoni : ùn c'hè micca u contu.
Steti à senta à Ghjuvan Cristofanu Angelini.
